తెలుగు హాస్య సామెతలు

సామెతల మీద నేను ఒక శీర్షిక ఆరంభించాను. అందులో ఇది రెండవది. మొదటి సంచిక యొక్క లింక్ ఈ కింద ఇస్తున్నాను. మీకు ఆసక్తి ఉంటే చదవగలరు.

http://teluguvanam.in/2024/09/14/telugu-saamethalu/

మనిషికి ఎన్ని ఉన్నా మనసారా నవ్వుకోలేనప్పుడు ఎన్ని ఉండి ప్రయోజనం లేదని నా అభిప్రాయం.అందుకని ఈసారి సామెతలలో కొంచం హాయిగా నవ్వుకోడానికి వీలుగా ఉన్నవి (నాకు నవ్వు వచ్చినవి😄) సంగ్రహించి (having compiled) ఇక్కడ ఉంచుతున్నాను.

1. అచ్చిరాని కాలంలో అడుక్కు తినబోతే ఉన్న బొచ్చె కాస్తా ఊడ్చుకొని పోయిందట.

2. అత్త చచ్చిన ఆరు నెలలకి కోడలు వలవలా ఏడ్చిందట.

3. అయ్యకు తొంభై తొమ్మిది మంచి గుణాలు ఉన్నాయి, కానీ రెండే తక్కువ – తనకుగా తోచదు, మరొకరు చెప్తే వినడు.

4. అయ్యవారేం చేస్తున్నారంటే అబద్ధాలాడి సద్దుకుంటున్నారట.

5. అరనిమిషం తీరికలేదు అర్ధరూపాయి సంపాదన లేదు

6. అల్లమంటే తెలియదా బెల్లమల్లే పుల్లగా ఉంటుంది అన్నాడట.

7. చాదస్తపు మొగుడు చెబితే వినడు, కొడితే ఏడుస్తాడు.

8. సెంటు భూమి లేని వానికెందుకు సెంటు వాసనలు.

9. అల్పుడికి ఐశ్వర్యం వస్తే అర్థరాత్రి గొడుగు పట్టమన్నాడట.

10. అవలక్షణం వాడికి అక్షింతలు ఇస్తే అవతలికి పోయి నోట్లో వేస్కున్నాడట.

11. అవ్వ వడికిన నూలు తాత మొలతాడుకు సరి.

12. ఆకలి అవుతున్నది అత్తగారూ అంటే రోకలి మింగవే కోడలా అన్నదట.

13. ఆకలి ఆకాశమంత, నోరు సూది బెజ్జమంత.

14. ఆకలి కాకుండా నీకు ఔషధమిస్తాగానీ ముందు మీ ఇంట్లో చద్దన్నం నాకు పెట్టు అన్నాడట.

15. ఆటాపాటా మాయింట, మాపటి భోజనం మీయింట.

16. ఆరునెలలు సాము (కర్రసాము) చేసి మూలనున్న ముసలమ్మను కొట్టినట్టు.

17. ఆలుబిడ్డలు అన్నానికి ఏడుస్తుంటే చుట్టానికి బిడ్డలు లేరని రామేశ్వరం పోయినాడట.

18. ఆవులు ఆవులు కుమ్ములాడితే మధ్య లేగల కాళ్ళు విరిగినట్టు.

19. ఇంటి దీపమని ముద్దుపెట్టుకుంటే మీసాలన్నీ కాలినవట.

మీ అభిప్రాయం తేలియజేయగలరు. మరి కొన్ని హాస్య సామెతలతో మరొక సంచికతో ప్రయత్నిస్తాను.

నా హాస్య విందుకు వచ్చనందుకు ధన్యవాదాలు. మీకు జీవితమంతా నవ్వు, సంతోషం, ఉండాలని కోరుకుంటూ… ఇప్పటికి సెలవు🙏🏻🙏🏻🙏🏻.